القائمة الرئيسية

الصفحات

أحدث المقالات [LastPost]

مراجعة كتاب لا شئ يتغير حتى تتغير أنت - دليل إلى التعاطف الذاتى وتحرير النفس

مراجعة كتاب لا شئ يتغير حتى تتغير أنت - دليل إلى التعاطف الذاتى وتحرير النفس

لا شئ يتغير حتى تتغير أنت 

مراجعة كتاب لا شئ يتغير حتى تتغير أنت - دليل إلى التعاطف الذاتى وتحرير النفس
النهارده معانا مراجعة كتاب جديد.. و إن شاء الله تستفادوا منه
إذا أردت أن تقرأ كتاب رائع عن نموذج للتغيير الشخصي الإيجابي وعن التعاطف الذاتى ( Self Compassion).. فبلا شك اقرأ هذا الكتاب
مراجعة كتاب
" لا شئ يتغير حتى تتغير أنت - دليل إلى التعاطف الذاتى وتحرير النفس "
ل مايك روبنز :

أولا : قصتى مع الكتاب وعرض سريع للكتاب :

- فى البداية كدا..
فى بداية عام ٢٠٢٠ ومع الإعلان عن معرض القاهرة الدولى للكتاب.. دخلت على النت وعلى صفحات الفيس بوك و قعدت أبحث عن الكتب الجديدة اللى نازله عشان اختار منها اللى هشتريه وكدا..
وأنا بقلب على موقع مكتبة جرير.. لفت نظرى الكتاب ده..
وخصوصا أن ده الطبعة العربية الأولى ليه ٢٠٢٠.. فقررت إنى أشتريه.. وبالفعل رحت معرض القاهرة للكتاب.. وفى فرع مكتبة جرير ووكيلها فى مصر .. اللى هو كان اسمه مكتبة نور العلم لقيت الكتاب ده واشتريته مع كتابين تانيين برغم الأسعار الغالية جدااا للكتب ده وكل كتب مكتبة جرير.. بس فعلا كتب مكتبة جرير تستاهل بجد..
والحمد لله فى يوم ١٥ فبراير ٢٠٢١ .. يعنى من ١٠ أيام بالظبط.. خلصت قراءة الكتاب ..
وعجبنى جداا عشان كدا هتكلم عليه شويه..
- الكتاب جميل جداا..٢٣٥ صفحة
.. بس الصفحة كبيرة ودسمة ومليانة سطور.. كعادة كتب مكتبة جرير يعنى..
الكتاب عبارة عن تجربة شخصية ملهمة هى تجربة الكاتب والمدرب والمتحدث التحفيزى ولاعب البيسبول السابق / مايك روبنز.. بيحكى فى ٤٠ فصل.. ٤٠ قصة أو موقف أو تجربة مر بيهم في حياته.. وإزاى قدر يتصرف فى المواقف ده..
أزمات.. ومِحن.. وأمراض.. وإصابات.. وموت.. وولادة أطفال.. وفشل.. وإخفاقات عديدة.. وموت أعز الناس عليه
ومع ذلك مايك روبنز قدر يتعامل مع كل ده فى حياته..
- الكتاب زى ما قلت ٤٠ فصل..
ممكن تقرأوه مثلا فى ٤ جلسات.. كل جلسة تاخد ١٠ فصول..
او ٨٠ صفحة يعنى..
ومتخفش مش هتزهقوا.. لأن أسلوبه فى السرد والحكي حلو جداا.. وكمان بيقولك وبيلخصلك الدرس المستفاد من الفصل فى آخر الفصل..
يعنى يحكى التجربة أو الموقف اللى حصله أو حصل لحد يعرفه وبعدين ف الآخر يقول نصيحته وخلاصة الدرس المستفاد من التجربة ده..
- الكتاب زى ما قلت نزل من سنة .. على حسب علمى..
النسخة العربية منه موجودة ورقيا.. مش موجودة pdf
النسخة الأجنبية منه اللى بالإنجليزى يعنى.. موجودة pdf بسهولة.. وأكيد موجودة ورقيا بس بره مصر بقي..
فاشتروا النسخة العربية وخلاص لو مش بتحبوا تقرأوا كتب إنجليزى pdf وكدا
- الكاتب مثقف جداا..
خلال صفحات الكتاب.. تم ذكر عدد كبير من أسماء الكتب الرائعة وأسماء مؤلفيها الأروع ..
وأسماء أغاني أجنبية وأفلام وقصائد شعر.. يعنى هتستفاد من العِلم اللى عند الكاتب بجد
وكمان من الملاحق اللى ف آخر الكتاب اللى ذكر فيها مصادر كتير وكتب للاستزادة العلمية والتطوير الشخصي المستمر..
ونصيحتى عشان تشبع من الكتاب وتهضمه.. خلى معاك قلم رصاص وخطط على اسماء الكتب والاغانى والافلام واى حاجة مفيدة يقولها الكاتب..
ونزلها واقرأها او اسمعها او شوفها..
من الآخر.. غوص فى بحر الكتاب.. واستخرج من أعماقه الصدف واللألئ..
واكتب مراجعة عن الكتاب زى ما أنا بعمل كدا.. ولخصه فى ورق عندك..
المهم تهضم الكتاب.. وتطبق كل اللى اتعلمته واستفدته على أرض الواقع..
...

ثانيا : أهم العبارات والاقتباسات اللى عجبتنى فى الكتاب :

١- " إذا استطعنا اكتشاف طريقة للتعامل اللطيف والطيب والمحبوب مع أنفسنا بينما نحاول أن نقوم بفعل شئ ما ، فإن فرص نجاحنا وإنجازنا تزداد بشكل كبير. وإذا لم نجد طريقة جديدة لفعل هذا الأمر ، فمن الممكن أن تصير المهمة أو الفعل أو الرغبة الأصغر مثل جبل لا نستطيع حتى الشروع فى تسلقه.
بعبارة أخري ، لا شئ يتغير ،حتى نتغير نحن! "
٢-" الحياة قصيرة للغاية".. ومن خلال إدراك هذا الواقع ، فإن الأمر الطبيعي لنا هو مسامحة من حولنا - ومسامحة أنفسنا.
٣- التقدير هو الهبة العظمى التى يمكننا منحها للآخرين ، ونحن غير مضطرين للانتظار حتى نحتضر لنقوم به أو حتى يحتضر شخص آخر لندعه يعلم تقديرنا له!
نحن غير مضطرين للانتظار حتى تحدث الأمور المؤلمة فى حياتنا لتوقظنا
٤- "الخبرة هى ما تحظى به حين لا تحصل على ما تريده"
٥- " أنت تخفق فى ١٠٠ ٪ من الفرص التى لا تنتهزها على الإطلاق" - واين جريتزكى
٦- ومثل العديد من الأمور فى الحياة التى نعلم أنها جيدة لنا
( التدريبات الرياضية والطعام الصحي والنوم الكافي وشرب المزيد من الماء وقول الحقيقة وهكذا) ،
فإن المعرفة لن تفيدنا ، بل التطبيق.
التطبييييييق يا جماعة 
٧- هناك بالفعل ٣ امور فقط تستطيعون السيطرة عليها فى رياضة البيسبول ، وفى الحياة ، فى هذا الصدد.
وهذه الأمور الثلاثة هى
توجهك وجهدك ومنظورك ،
وهذا هو كل شئ.
إذا استطعت تركيز انتباهك على هذه الأمور الثلاثة -
بجعل توجهك إيجابيا قدر الإمكان ،
وجهدك متقدا إلى أقصي حد ، ومنظورك صحيا قدر ما تستطيع ،
إذن ستستطيع أن تكون عضوا منتجا فى فريق الرامين وفى النهاية فى هذا الفريق ككل.
الأمر ذاته ينطبق على الحياة.
وتذكر أن هذه الأمور ستساعدك على المشاركة بفاعلية فى أى شئ يحدث ".
.....
أخيرا.. وليس آخرا :

حابب أقول وأذكر عبارة قالها
د. داتشر كيلتنر.. أستاذ علم النفس فى جامعة يو سى بيركلي ومؤلف كتاب
Born to be Good
قال الجملة ده فى مدحه للكتاب :
".. اقرأ هذا الكتاب، وسيغير حياتك وحياة من حولك"
فرجاءا اللى يقرأ الكتاب..
يبقى يقولى او يكتبلي رأيه عنه

 
reaction:

تعليقات